Magaalada Baydhabo ee xarunta gobolka Bay maanta (19-Nov-2019-ka) waxaa ka furmay tababbar
hal maalin oo ku saabsan sida haweenka ka shaqeeya warbaahinta ay ugu biiri karaan maamulka
iyo hogaaminta xarumaha warbaahinta.
Tababarka waxaa ka qaybgalaya 12 haween ah oo ka kala socda qaybaha kala duwan ee
warbaahinta. Tababbarka oo ay soo qaban qaabisay Media Women Network ayaa dhaqaalaha waxaa ka taageeray hay’adaha IMS iyo Fojo. Furitaanka waxaa ka hadlay agaasimaha guud ee wasaaradda warfaafinta ee dowlad goboleedka Koonfur Galbeed Khayrre Cali Isaaq.
Wuxuu sheegay in tababbarkan ku saabsan maamulka iyo hogaaminta ee loo qabtay haweenka
warbaahinta ka shaqeeya uu yahay kii ugu horreeyey ee ka dhaca magaalada Baydhabo, taasi oo
uu ku tilmaamay inay tahay fursad muhiim ah.
Shukri Bidhaan oo ka mid ah haweenka ka qaybgalaya tababbarka ayaa sheegtay in maanta ay
tahay maalin cusub oo ay baranayaan casharro cusub oo dhiirigalinya haweenka ka shaqeeya
warbaahinta oo aan horay u helin jirin barnaamijyadan oo kale.
“Waan ku faraxsanahay in maanta aan qaato tababbar la xariira maamulka iyo hogaaminta oo aan
wax badan raadin jiray in aan helo, anigu waxaan doonayaa in aan mustaqbalka noqdo wasiir,
riyadeyda wuxuu ka dhigayaa tababarkan in aan qaado tillaabada koobaad oo aan ku raadsan karo waxa aan
doonayo, mahadsanid Media Women Network,”. Sidaa waxaa tiri Shukri Bidhaan.
Kaafiya Naaleeye oo ah agaasimaha Media Women Networka ee tababarrada, ayaa sheegtay in u
jeedka laga leeyahay tababbarkan uu yahay in kor loo qaado aqoonta, xirfadda iyo in dumarka la
tuso inay awoodaan inay qaban karaan hogaaminta iyo maamulka warbaahinta oo ay hadda aad
ugu yaryihiin.
“Waxaan u baahannay isbadal ah in haweenku warbaahinta hogaamiyaan, taasi
waxay sahalaysaa in la helo isku dheelitirnaanta sheekooyinka laga sameeyo oo hadda u
muuqda inay ragga ay u badan yihiin, codka haweenkana uu aad ugu yaryahay warbaahinta,”. Ayay tiri Kaaifyo.
Haweenka ayaa la barayey sidii ay u hadli lahaayeen oo ay u raadsan lahaayeen wax ay u baahanyihiin, inay ka doodaan shirka ay yeeshaan xarumaha warbaahinta si ay u soo bandhigaan in si siman loo wadaago guud ahaan shaqooyinka.
Media Women Network, ayaa ku dhawaad 70 gabdhood u tababartay hogaaminta iyo maamulka
tan iyo 2018-ki ayada oo taageero ka helaysa hay’adaha IMS iyo FOJO.
